ដីព្រៃគ្រប់គ្រងដោយរដ្ឋរាប់សិបហិកតានៅចំនុចព្រៃកេងកង ដែលស្ថិតនៅភូមិស្រយ៉ង់ជើង ឃុំស្រយ៉ង ស្រុកគូលែន ខេត្តព្រះវិហារ បច្ចុប្បន្នដីព្រៃខាងលើនេះត្រូវបានក្លាយទៅជានំខេក របស់ក្រុមឈ្មួយដែលជាអ្នកមានលុយដាក់ គ្រឿងចក្រប្រភេទអេស្កាវ៉ា ចូលឈូសឆាយដោយគ្មានក្រែងរអារំលោភកាន់កាប់យ៉ាងគឃ្លើនក្លាយជាវាលរហោ ស្ថាន ស្ទើរបាត់អស់ពីក្នុងរង្វង់ នៃផែនទីដែលមានពីមុនមក ។

ការដែលពួកក្រុមឈ្មួញថ្លើមធំពាសមេឃ ហ៊ានដាក់គ្រឿងចក្រធ្វើសកម្មភាពចូលទៅឈូសឆាយទន្រ្ទានរំលោភ កាន់កាប់បានយ៉ាងរលូនបែបនេះ ត្រូវបានមហាជនក៏ដូចជាក្រុមប្រជាពលរដ្ឋបានដាក់ការសង្ស័យទៅលើអាជ្ញាធរ ឬសមត្ថកិច្ចជំនាញពាក់ព័ន្ធក្នុងមូលដ្ឋានក្នុងតំបន់នោះ ទំនងទទួលបានលាភសក្ការះពីក្រុមឈ្មួញថ្លើមដុះមមិះទាំង នេះហើយទើបបានបិតភ្នែកបើកភ្លើងខៀវ និងមួយវិញទៀត ដោយមានទស្សន:មួយបែបទៀតលើកឡើងថា បើ សិនជាខ្មោចស្រុកមិនបើកដៃ នោះខ្មោចព្រៃក៏វាមិនហ៊ាននោះដែរ ។

ជុំវិញនឹងករណីនេះលោក ប៉ែន ជឹង អភិបាលនៃគណ:អភិបាលស្រុកគូលែន បានប្រាប់មកក្រុមអ្នកសារព័ត៏មាន នៅតាមប្រព័ន្ធសង្គមតេលេក្រាមនាថ្ងៃទី២០ ខែមេសា ឆ្នាំ២០២៥កន្លងទៅនេះថា ដីព្រៃដែលក្រុមឈ្មួញដាក់ គ្រឿងចក្រឈួសឆាយខាងលើ គឺស្ថិតក្នុងដីសម្បទានសេដ្ឋកិច្ច ក្រុមហ៊ុន អេមីនិន ខូលអិលធីឌី ។ យ៉ាងណាក៏ដោយ លោកអភិបាលស្រុកថា ក្រោយទទួលបាននូវព័ត៏មានខាងលើនេះហើយ លោកបានដាក់ក្រុមកាងារនឹងលោក សន ណូ ប្រធានក្រុមហ៊ុនដឹកនាំកម្លាំងចុះពិនិត្យស្រាវជ្រាវ ដើម្បីនឹងរៀបចំបណ្ដឹង ។

លោកបានបន្តទៀតថា ក្រុមខាងលើនេះ គឺគេមកពីខេត្តសៀមរាប ដែលពួកក្រុមឈ្មួញទាំងនេះ គឺគេតែងឆក់ឱកាស ក្នុងពេលរវល់បុណ្យទាន នូវពេលសមត្ថកិច្ចកំពុងជាប់រវល់ បើទោះយ៉ាងនេះក្តីលោកអភិបាលស្រុកថា នឹងចាត់ចែង ការងារនេះឲ្យមានលទ្ធផលល្អ រកជនល្មើសឲ្យឃើញ ។

ពាក់ព័ន្ធទៅនឹងករណីផងដែរ អង្គភាពយើងមិនអាចសុំការបំភ្លឺពីលោក សន ណូប្រធានក្រុមហ៊ុន អេមីនិន ខូអិល ធីឌីនេះបានទេ នៅមុនម៉ោងផ្សាយនេះ ដោយមិនមានលេខទូរសព្ទ័របស់លោក ។ បើទោះយ៉ាងនេះក្តីត្រូវបានមហា ជនលើកឡើងថា បច្ចុប្បន្នដីព្រៃដែលលោកអភិបាលស្រុកលោក ប៉ែន ជឹង ថាជាដីក្រុមហ៊ុននោះ ដែលដីព្រៃខាង លើបច្ចុប្បន្នគឺនៅសេសសល់យ៉ាងច្រើនប្រហែលជា៣០ទៅ៤០%តែប៉ុណ្ណោះ ដោយក្រៅពីហ្នឹងត្រូវបានក្លាយទៅ ជាចំការដំឡូងមី និងមួយផ្អែកទៀតជាចំការស្វាយ ឬក៏ស្វាយចន្ទីអស់រួចទៅហើយ។

ដែលករណីទាំងនេះត្រូវគេដាក់កាសង្ស័យថា ទំនងជាក្រុមហ៊ុនខាងលើក្ស័យធន់ ហើយទើបមកដល់និងម៉ោងនេះ មិនឃើញក្រុមហ៊ុនមានសកម្មភាពអភិវឌ្ឍទៅលើអ្វីមួយនៅលើផ្ទៃដីរបស់ខ្លួនដូចសព្វថ្ងៃនេះ តែសន្លឹកបៀរនេះ គឺឋិតនៅលើដៃតំណាងក្រុមហ៊ុនបើក្រុមហ៊ុនចែក ឬបោះឲ្យទៅលើបុគ្គល ឬក៏ក្រុមបក្ខពួកណាមួយក្នុងចេតនា លាក់បាំងនោះដែលអំរែកដ៏ធ្ងន់មួយនេះ ទៅថ្ងៃមុខ គឺថ្នាក់ដឹកនាំអាជ្ញាធរខេត្តជាពិសេស គឺរាជរដ្ឋាភិបាលតែម្តង ដែលជាអ្នកទទួលថ្មប្រេះ តួរយ៉ាងដូចជាករណីដីក្នុងក្រុមហ៊ុនសីលាដាម៉ិចជាដើម ។
ក្រោយពីការរំលោភកាន់កាប់ខុសច្បាប់ពីសំណាក់ក្រុមឈ្មួញក៏ដូចជាក្រុមប្រជាពលរដ្ឋចំណាកខេត្តផ្សេងៗមកនោះ ហើយក្រោយពីម្ចាស់ក្រុមហ៊ុនសើររើវិញ ដែលរាល់បញ្ហាទាំងអម្បាលមាណទាំងនេះ គឺត្រូវបានធ្លាក់មកលើ រដ្ឋបាលខេត្តទាំងស្រុង ជាអ្នកដោះស្រាយរាល់បញ្ហាប្រឈមទាំងនេះ ។

ដើម្បីបញ្ជៀសបានលើបញ្ហានេះកុំឲ្យធ្លាក់ចូលក្នុងគន្លងផ្លូវចាស់ ដូចករណីដីក្នុងក្រុមហ៊ុនសីលាដាម៉ិចទៀតនោះ អាជ្ញាធរមូលដ្ឋាន ជាពិសេសលោក ប៉ែន ជឹង អភិបាលនៃគណ:អភិបាលស្រុកគូលែន គួរលោកមានវិធានការ ឲ្យបានតឹងរឹងបំផុត ទៅលើក្រុមឈ្មួញទាំងនេះ ពីព្រោះកន្លងមករឿងករណីដីព្រៃដែលកើតមានឡើងនៅតាមបណ្តា ភូមិសាស្ត្រនានាក្នុងស្រុកគូលែននេះ វាបានក្លាយទៅជារឿងច្រំដដែលៗពេកហើយ បើករណីនេះបែកធ្លាយដល់ អ្នកសាព័ត៏មានហើយ ទើបអាជ្ញាធរហាក់បីដូចស្ទុះស្ទៀរៀបចំកម្លាំងចុះពិនិត្យ ហើយក្រោយពីកម្លាំងចុះពិនិត្យរួច ហើយជាទូទៅទីតាំងដីព្រៃដែលឈូសឆាយទាំងនេះ ត្រូវបានធ្លាក់ទៅលើដៃនៃពួកក្រុមឈ្មួញដដែលជាដដែល ចំនុចនេះហើយដែលមហាជនរិះគន់ថា នេះហើយដែលជាភាពកំសោយរបស់អាជ្ញាធរ ។

ព្រោះអីករណីបើលោកអភិបាលស្រុកមានឆន្ទះក្នុងការស្រាវជ្រាវរកក្រុមជនទាំងនេះ យកមកផ្តន្ទាទោសនោះ គឺជា ភាពងាយស្រួលជាងបកចេកទៅទៀត ពីព្រោះដូចពាក្យមួយឃ្លាដែលពោលមកថា ក្តាមកាត់ស្រូវស្រែណា គឺវានៅ ស្រែនោះឯង មួយវិញទៀតដើម្បីបញ្ចប់បាននូវបញ្ហានេះទៅបានលោកអភិបាល ស្រុកគួរប្រើកណ្តាប់ដៃដែកទៅ លើបុគ្គល ឬបក្ខពួកក្រុមឈ្មួញទាំងនេះ គឺធ្វើមួយនាក់ឬពីរនាក់ ជាការព្រមានទៅលើ១០០០នាក់ ។ មួយបែបទៀត គឺអារកមាន់បន្លាចស្វាកុំឲ្យចេះតែរពឹសដៃពេក អារឿងដីព្រៃនេះ គឺល្មមគ្រប់គ្រាន់ហើយ ។

មួយវិញទៀតដើម្បីបញ្ជាក់នូវភាពស្អាតស្អំ នូវរាល់បាតុភាពតាមអ្វីដែលកាលើកឡើងរបស់មហាជន ក៏ដូចមជ្ឈ ដ្ឋានមួយចំនួន ដែលបានដាក់ការសង្ស័យទៅលើលោកអភិបាលស្រុកថា ទទួលបានលាភសក្ការះពីក្រុមឈ្មួញទាំង នេះតាមមាត់ចាបមាត់ព្រាបកន្លងមកផងដែរ ។ បើទោះយ៉ាងនេះក្តីប្រជាពលរដ្ឋសង្ឃឹមហើយនឹងជឿជាក់លើ
ឯកឧត្តម គីម រិទ្ទី អភិបាលនៃគណ:អភិបាលខេត្តព្រះវិហារ ថាពិតជាឯកឧត្តមនឹងមិនទុកបណ្តែតបណ្តោយឲ្យពួក ក្រុមឈ្មួញទាំងនេះនៅបានបន្តធ្វើសកម្មភាពបែបអនាធិបតេយ្យនោះទៀតដែរ ពីព្រោះកន្លងមកឯកឧត្តមធ្លាប់ លើកឡើងហើយថា ប្រទេសប្រជាធិបតេយ្យ មិនមែនអាណាធិបតេយ្យ អ្នកណាដណ្តើម ឬច្បាមយកអីបានតាម តែអំពើចិត្តទេ រឿងសម្បត្តិធនធានធម្មជាតិនោះ ចំនុចនេះហើយប្រាកដជា ឯកឧត្តមនិងមិនទុកឲ្យករណីថ្មី ដែល កើតមានទាំងនេះ ដើរលើគន្លងចាស់ដូចនាពេលកន្លងមកនោះដែរ ៕