នោះដូចគេថា ទេវតាពិតជាមិនសុក្រិតយុត្តិធម៌ពិតមែនសម្រាប់ឆាកជីវិតមនុស្សលោក យ៉ាងណាមិញអ្នកមាន គឺនៅតែក្នុងផ្ទះក៏លុយកាក់ទ្រព្យធនហូរចូលឲ្យយ៉ាងសន្ធឹកសន្ធាប់ ដោយឡែកអ្វីអ្នកដែលមានសភាពទីទាល់ក្រ មានជីវភាពបានព្រឹកខ្វះល្ងាចបានល្ងាចខ្វះព្រឹក បែរជាទទួលរងនូវគ្រោះចង្រៃទុក្ខជាន់លើទុក្ខរកអ្វីមកប្រៀបប្រ ដូចមិនបាន ។

តាមព័ត៌មានបញ្ជាក់ថា ស្ត្រីចំណាស់ម្នាក់មានជីវិតទីទាល់យ៉ាងខ្លាំង រកព្រឹកខ្វះល្ងាច រកល្ងាចខ្វះព្រឹក ស្ត្រីចំណាស់ម្នាក់នោះ បានចេញទៅលាងចានឱ្យគេ ដើម្បីបានចំណូលតិចតួចស្តួចស្តើងនោះ មកដោះស្រាយជីវភាពប្រចាំថ្ងៃ
ប៉ុន្តែពេលត្រឡប់មកដល់ផ្ទះវិញ បែរជាត្រូវបានអគ្គិភ័យឆាបឆេះផ្ទះសម្បែងអស់គ្មានសល់ ធ្វើទឹកភ្នែកបានស្រក់ ចុះ ទ្រហោយំយ៉ាងខ្សឹបខ្សួល ។

ហេតុការណ៍ឆេះផ្ទះស្ត្រីចំណាស់នេះ បានកើតឡើងកាលពីវេលាម៉ោង០៣រសៀល ថ្ងៃទី២២ ខែមីនា ឆ្នាំ២០២៥ នៅក្នុងភូមិស្នោរទី១ សង្កាត់រកាធំ ក្រុងច្បារមន ខេត្តកំពង់ស្ពឺ ។ តាមប្រភពព័ត៌មានពីនគរបាលប៉ុស្តិ៍សង្កាត់រការធំ បានឱ្យនិយាយដឹងថា មានករណីឆេះផ្ទះមួយខ្នងដែលសង់ឡើងពីឈើជាប់ដី ប្រក់ស័ង្កសី ទំហំ៥ម៉ែត្រ គុណនឹង៦ម៉ែត្រ ស្ថិតនៅក្នុងភូមិស្នោទី១ សង្កាត់រការធំ ក្រុងច្បារមន ខេត្តកំពង់ស្ពឺ ម្ចាស់ផ្ទះមានឈ្មោះ ពេជ្រ ទូច ភេទស្រី អាយុ៦៥ឆ្នាំ មានមុខរបរស៊ីឈ្នួលលាងចានឱ្យគេ តាមរោងការ និង រោងបុណ្យ ។

នគរបាលប៉ុស្តិ៍សង្កាត់រការធំដដែលបានបន្តថា នៅមុនពេលកើតហេតុស្ត្រីចំណាស់ម្ចាស់ផ្ទះខាងលើបានទៅស៊ីឈ្នួលលាងចានឱ្យគេ ហើយបានទុកចៅស្រីអាយុប្រហែល១២ឆ្នាំឱ្យនៅចាំផ្ទះ ក្រោយមកនៅម៉ោងកើតហេតុ ស្រាប់តែនៅផ្នែកខាងក្រោយនៃចង្ក្រានបាយក៏មានអណ្តាតភ្លើងឆេះឡើងយ៉ាងសន្ធោសន្ធៅ គ្រានោះរថយន្តបង្ការពន្លត់អគ្គិភ័យ នៃស្នងការដ្ឋានខេត្តបានចេញអន្តរាគមន៍ ដើម្បីជួយបាញ់ពន្លត់ តែមិនអាចជួយសង្គ្រោះបានឡើយ ដោយសារតែផ្លូវមានភាពតូចចង្អៀត ហើយត្រូវបានអ្នកភូមិសង់រោងការ និងរោងបុណ្យ អមសងខាង មិនអាចឱ្យរថយន្តសង្គ្រោះចូលជួយអន្តរាគមន៍បានទាន់ពេលវេលាឡើយ ។

នៅទីបំផុតផ្ទះឈើមួយខ្នងនេះត្រូវបានឆេះអស់ទាំងស្រុង ហើយអីវ៉ាន់ទាំងអស់ដែលស្ថិតនៅក្នុងផ្ទះនោះក៏មិនអាចយកចេញបានដែរ ។ នេះគឺជារឿងរ៉ាវមួយនៅក្នុងសង្គម គួរឲ្យសង្វេក និងអនិច្ចា សម្រាប់ឆាកជីវិតមនុស្ស ដែលខំ ប្រឹងតស៊ូ តែនៅតែទទួលរងនូវគ្រោះកាច ។