ឆាកជីវិតមនុស្សថ្វីបើកើតឡើងមកហើយមានជីវិតដូចគ្នា ប៉ុន្តែវាសនាមិនប្រាកដថាដូចគ្នានោះទេ យ៉ាងណាមិញ
ក្មេងៗដែលរស់នៅជាមួយក្រុមគ្រួសារដ៏កក់ក្តៅ ក្នុងទីប្រជុំជនពោពេញដោយភាពហ៊ឺហាឡូយឆាយច្បាស់ណាស់ ថាពួកគាត់អាចមានការយកចិត្តទុកដាក់ខ្ពស់ពីគ្រួសារ ដូច្នេះការចាយវាយច្បាស់ណាស់គឺពេញដោយភាពសំបូរ បែប ប៉ុន្តែសម្រាប់ក្មេងៗមួយចំនួនដែលមានការរស់នៅទីចុងកាត់មាត់ញកឃ្លាតឆ្ងាយពីទីប្រជុំជន និងមានជីវ ភាពខ្សត់ខ្សោយ ច្បាស់ណាស់ពួកគាត់ពុំសូវជាមានការចាយវាយឲ្យបានទូលាយ និងទទួលបានភាពកក់ក្តៅពីអា ណាព្យាបាលដូចកុមារដែលរស់នៅទីប្រជុំជននោះឡើយ ក៏ព្រោះតែឪពុកម្តាយរបស់ពួកគាត់ ជាប់ភារៈកិច្ចច្រើន សម្រាប់ស្វែងរកកម្រៃដោះស្រាយជីវភាព ។

ឯកឧត្តម ហួន ច័ន្ទថុន បានមានប្រសាសន៍ថា នៅព្រឹកថ្ងៃសុក្រ ២រោច ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែកុម្ភៈ ឆ្នាំ២០២៥ នេះ រូបខ្ញុំមានឧិកាសទទួលបានអញ្ជើញពីរូបឯកឧត្តម បណ្ឌិត ហែម ប្រសើរ ដែលជាប្រធានសម្ព័ន្ធភាពបណ្តុំសមាគមអង្គការសង្គមស៊ីវិល និងជាប្រធានសមាគមសម្ព័ន្ធភាពដើម្បីមនុស្ស ធម៌ ធ្វើឲ្យរូបខ្ញុំបានចូលរួមក្នុងការចុះជួបសំណេះសំណាលជាមួយកូនៗដែលមានវ័យកុមារកំពុងសិក្សានៅសាលា បឋមសិក្សាតាកកោះមានទីតាំងស្ថិតនៅក្នុងភូមិកំពង់រាំង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។

ក្នុងឧិកាសនោះ ខ្ញុំពិតជាមានអារម្មណ៍រំភើប និងរំជួលចិត្តជាខ្លាំង នៅពេលឃើញកែវភ្នែកដ៏ភ្លឺនិងស្រស់បំព្រង របស់កូនៗដោយភាពជឿជាក់និងក្តីសង្ឃឹមក្នុងការសិក្សា អនាគត ។ ការទទួលយកអំណោយពោពេញដោយ ស្នាមញញឹម និងមានជំនឿចិត្តនេះ ធ្វើឲ្យបេះដូងរបស់ខ្ញុំក៏ ដូចជាថ្នាក់ដឹកនាំជាច្រើនរូបទៀត មានក្តីសង្ឃឹមថា កូនៗអាចជាទំពាំងដ៏ល្អប្រសើរ សម្រាប់សង្គមនាពេលអនាគត ។

គួរបញ្ជាក់ថា សាលាបឋមសិក្សាតាកកោះ គឺពិតជាមានសភាពខ្វះខាតខ្លាំងពិតមែន ជាក់ស្តែងនៅពេលរដូវប្រាំង កុមារទាំងអស់អាចធ្វើដំណើរមករៀនសូត្រដោយថ្មើជើងបាន ប៉ុន្តែនៅពេលទឹកឡើង គឺកុមារទាំងអស់នោះ ត្រូវ ជិៈទូកទៅរៀន ដែលប្រឈមទៅនឹងភ្លៀងខ្យល់មួយចំនួនផងដែរ ។ ចំពោះភូមិកំពង់រាំងនេះ មានប្រជាពលរដ្ឋ ចំនួន ១៦៨ គ្រួសារ ហើយមានត្រឹមសាលាមួយអគារនេះទេដែលជាអំណោយរបស់ជប៉ុន ហើយជាក់ស្តែងសាលា ក៏ចាំបាច់ត្រូវការអគារសិក្សាបន្ថែមផងដែរ ។