នេះជាការបើកទំព័រថ្មីស្រឡាងមួយ ដែលពុំធ្លាប់មានទាល់តែសោះ ខណះឯកឧត្តម នួន ផារ័ត្ន អភិបាលខេត្តកំពង់ធំ បន្ទាប់ពីប្រកាសចូលកាន់តំណែងក្តៅៗសោះ ក្នុងនាមប្រធានគណៈបញ្ជាការឯកភាពរដ្ឋបាលខេត្តកំពង់ធំ ឯកឧត្តម បានប្តេជ្ញាចិត្តយ៉ាងមុះមុត ចូលរួមក្នុងកិច្ចការពារទប់ស្កាត់បង្ក្រាបបទល្មើសធនធានធម្មជាតិ ក៍ដូចជាបទល្មើសនានា ក្នុងភូមិសាស្ត្រខេត្តមួយនេះ ឯកឧត្តមសម្រេចចិត្ត យកថវិការផ្ទាល់ខ្លួនមួយចំនួនធំដើម្បីទិញម៉ូតូ១៤គ្រឿង ប្រគល់ជូន ដល់កងកម្លាំងចម្រុះ សម្រាប់បង្រ្កាបបទល្មើស គោលដៅចំបងឯកឧត្តមផ្តោតសំខាន់លើ បទល្មើសធនធានធម្មជាតិ ក្នុងនោះក៍មានប្រេងសាំង១,៤០០លីត្រ ព្រមទាំងភេសជ្ជៈ ស្បៀងអាហារ និងគ្រឿងឧបភោគបរិភោគមួយចំនួនទៀត។

ក្នុងឧិកាសប្រជុំបូកសរុបលទ្ធផលការងារបង្រ្កាបបទល្មើសនានារយះពេលកន្លងមកការសម្រេចចិត្ត របស់ ឯកឧត្តម អភិបាលខេត្តកំពង់ធំ គឺបានធ្វើឡើងតាមការសំណូមពរ និងឆ្លើយតប ទៅនិង ឧត្តមសេនីយ៍ទោ សោម ស៊ុន អនុប្រ ធានគណៈបញ្ជាការឯកភាពរដ្ឋបាលខេត្ត និងជាអនុប្រធានអចិន្ត្រៃយ៍គណៈកម្មការគ្រប់គ្រងការពារទប់ស្កាត់ និង បង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំ គឺក្នុងគោលបំណងបម្រើក្នុងសកម្មភាពការពារទប់ស្កាត់ និងបង្រាបបទល្មើស ឲ្យទទួលបានជោគជ័យ ជាវិជ្ជមាន ។

ប្រសាសន៍នេះ ត្រូវបានលើកឡើងក្នុងកិច្ចប្រជុំនេះគណៈបញ្ជាការឯកភាពរដ្ឋបាលខេត្តកំពង់ធំឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង បញ្ជាក់ពីលទ្ធផលសកម្មភាពការងាររយៈពេល៧៥ថ្ងៃ ក្នុងការ បង្រ្កាបបទល្មើស គឺទទួលបានលទ្ធផលជោគជ័យ បានគ្រប់គ្រងផ្ទៃដីមកវិញជាង១,៣០០ហិកតា ស្រាវជ្រាវមុខសញ្ញា ដើម្បីកសាងសំណុំរឿងបញ្ជូនទៅកាន់តុលាការ និងបានបន្តថា ភាពជោគជ័យនេះ គឺដោយសារកងកម្លាំងប្រដាប់ អាវុធទាំងបី មន្ត្រីស្ថាប័នពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ សហការគ្នាបានល្អ និងបន្តសកម្មភាពដូច ភ្លៀងរលឹម។

ឯកឧត្តម នួន ផារ័ត្ន បានគាំទ្រការអនុវត្តនូវវិធានការ ការពារទប់ស្កាត់ និងបង្ក្រាបបទល្មើសធនធានធម្មជាតិនេះ ឲ្យដូចភ្លៀងរលឹម មិនដកថយឡើយ ត្រូវរៀបចំយុទ្ធនាការក្នុងការប្រើប្រាស់កម្លាំងសរុប ដើម្បីដាំដើមឈើឡើងវិញ នៅលើផ្ទៃដីដែលបានកាប់រានកន្លងទៅ និងផ្ទៃដីដែលបានដករហូតពីការទន្ទ្រានកាន់កាប់ដោយខុសច្បាប់ ។