អុញនោះមានរឿងថ្មីទៀតស្រេច... ប្លែកមែនសាលាឯកជនអន្តរជាតិកម្ពុជាហៅកាត់ថាCIS ស្រាប់តែបិទទ្វារ មិនមានការដំណឹងជូនសិស្សានុសិស្សអ្វីសោះ នៅក្រោយពេលសាលាប្រមូលថ្លៃសាលាពីសិស្សរួច
ពិតជាថ្មីប្លែកចម្លែកអារម្មណ៍ពិតមែន ដែលធ្វើមហាជនជាច្រើននៅពេលដែលបានទទួលដំណឹងនេះភ្លាម ចាប់ផ្តើមកើតជាមន្ទិលដាក់ការសង្ស័យឡើងឲ្យគ្រប់ៗគ្នា ដោយការយល់សុទ្ធតែមានគំនិតផ្សេងៗគ្នា ។
សូមបញ្ជាក់ថាថ្មីៗនេះមានរឿងដ៏ចម្លែកមួយបានកើតឡើង ហើយបង្កការភ្ញាក់ផ្អើលដល់អាណាព្យាបាល សិស្ស ដែលបានចុះឈ្មោះចូលរៀនក្នុងសាលាឯកជនអន្តរជាតិកម្ពុជា(CIS) ដែលមានអាស័យដ្ឋានស្ថិតនៅ ក្នុងភូមិថ្នល់ថ្មី ឃុំបារាយណ៍ ស្រុកបារាយណ៍ ខេត្តកំពង់ធំ ក្នុងនោះអាណាព្យាបាលសិស្សានុសិស្សប្រមាណ ជិត១០០នាក់បានសំដែងការហួសចិត្ត ចំពោះសាលាឯកជនអន្តរជាតិកម្ពុជា ហៅកាត់ថា CIS ដោយនៅ ក្រោយពីបានប្រមូលលុយថ្លៃបង់សាលារួចហើយ ស្រាប់តែសាលាបានបិទទ្វារមិនបង្រៀនសិស្សដោយពុំបាន ជូនដំណឹងអ្វីឡើយ ។
បើតាមប្រភពព័ត៌មានពីប្រជាពលរដ្ឋជាអាណាព្យាបាលសិស្សដែលបានចុះឈ្មោះរៀនក្នុងសាលាអន្តរជាតិកម្ពុជាហៅកាត់ថា ស៊ីអាយអេស បានបញ្ជាក់ប្រាប់ថា មានក្រុមការងារមួយក្រុមបានដើរប្រមូលកៀងគរ កុមារាកុមារីឲ្យទៅរៀននៅសាលារៀនរបស់ពួកគេ ដែលទើបនឹងបើកថ្មីដែលមានកម្មវិធីសិក្សា ភាសារអង់ គ្លេស ភាសារខ្មែរ កំព្យូទ័រ ។ល។ នឹងមានថ្លៃសាលាសមរម្យគឺមាន០៣របៀប ។ របៀបទី០១ បង់៣០០ដុល្លា ក្នុង១ឆ្នាំបង់៥០%មុន ៥០%បង់រំលោះ ។ របៀបទី០២បង់ផ្ដាច់២៥០ដុល្លាក្នុង១ឆ្នាំ ។ របៀបទី០៣បង់ត្រឹមតែ ៨២ម៉ឺនរៀល ដោយប្រើមធ្យោបាយខ្លួនទាំងទៅទាំងមក ។
ជាក់ស្តែងអាណាព្យាបាលទាំងអស់ ដោយហេតុតែស្រលាញ់ការសិក្សានិងចង់ឱ្យកូនបានចេះដឹងផងនោះ ពួក គាត់បានយល់ព្រមចុះឈ្មោះឲ្យកូនទៅរៀននិងបានបង់ប្រាក់ជូនសាលាគ្រប់ចំនួន ដើម្បីបង្កលក្ខណៈងាយ ស្រួលជូនសាលា នឹងមានសិស្សខ្លះទៀតនៅមិនទាន់បានបង់ថ្លៃសាលារួច ។
សាលាអន្តរជាតិកម្ពុជាហៅកាត់ថាCIS បានបង្ហាត់បង្រៀនរយៈពេល៣ខែជាងហើយ បានតម្រូវឲ្យសិស្ស ដែលមិនទាន់បង់ថ្លៃសាលាត្រូវបង់ថ្លៃសាលាមុនសិន ស្រាប់តែក្រោយពីអាណាព្យាបាលសិស្សបានបង់ថ្លៃ សាលារួចហើយ សាលាបានបិទទ្វារតាំងពីថ្ងៃទី១៩ ខែមីនា ឆ្នាំ២០២៤ រហូតមកដោយគ្មានការជូនដំណឹង។
អាណាព្យាបាលសិស្សដែលរស់នៅក្នុងឃុំបារាយណ៍ក៏ដូចជាឃុំដទៃទៀត ក្នុងស្រុកបារាយណ៍ដែលមានកូន ទៅរៀននៅសាលាអន្តរជាតិកម្ពុជាហៅកាត់ថាCIS សូមអំពាវនាវដល់លោកនាយកសាលាអន្តរជាតិកម្ពុជា ហៅកាត់ថាCIS ព្រមទាំងក្រុមការងាររបស់សាលាទាំងអស់ ឲ្យចូលខ្លួនមកដោះស្រាយជាមួយពួកគាត់ផង ព្រោះថ្លៃសាលាគាត់បានបង់រួចរាល់អស់ហើយ។
ចំណែកលោកស្រីមេភូមិថ្នល់ថ្មីបានបញ្ជាក់ប្រាប់ថា លោកស្រីធ្លាប់បានសួរនាំនាយកសាលានិងក្រុមការងារ ថាមានច្បាប់ដែរឬទេប៉ុន្តែខាងសាលាអន្តរជាតិកម្ពុជាហៅកាត់ថាCIS ប្រាប់ថាមានច្បាប់សញ្ញ៉េដល់ស្រុកខេត្ត អស់ហើយ តែសម្រាប់លោកស្រីគេមិនដែលបានប្រាប់អ្វីឡើយ។
ជាចុងក្រោយអាណាព្យាបាលសិស្សជិត១០០នាក់ដែលបានបង់ថ្លៃសាលារួចហើយ សូមសំណូមពរដល់ អាជ្ញាធរពាក់ព័ន្ធមេត្តាជួយអន្តរាគមន៍ស្វែងរកលោកនាយកសាលាអន្តរជាតិកម្ពុជាហៅកាត់ថា CIS ដើម្បី មកដោះស្រាយរកយុត្តិធម៌ជូនពួកគាត់ផងទាន ៕
