ឯកឧត្តម ហួន ច័ន្ទថុន បាននិយាយថា កាលពីថ្ងៃទី១២ ខែធ្នូ ឆ្នាំ២០២៤ កន្លងទៅនេះ ទីស្តីការគណ:រដ្ឋមន្ត្រី បានចេញសេចក្តីជូនដំណឹងរួចមកហើយតាមរយ:លិខិតលេខ ២០២៤ សជណ០៧ ដោយមានខ្លឹមសារថា សូម ជម្រាប ឯកឧត្តម លោកជំទាវ លោក លោកស្រី ដែលត្រូវប្រកាសទ្រព្យសម្បត្តិនិងបំណុលតាមរប០២ឆ្នាំ សម្រាប់ឆ្នាំ២០២៥ សូមពិនិត្យកាលបរិច្ឆេទកំណត់លើស្រោមសំបុត្រដែលបានប្រកាសនៅក្នុងឆ្នាំ២០២៣ ជ្រាបថា អង្គភាពប្រឆាំងអំពើពុករលួយនឹងចាប់ផ្តើមទទួលឯកសារប្រកាសទ្រព្យសម្បត្តិនិងបំណុល តាមរបប ០២ឆ្នាំ របស់ថ្នាក់ដឹកនាំ និងមន្ត្រីរាជការ នៃទីស្តីការគណ:រដ្ឋមន្ត្រី និងអង្គភាពចំណុះនៅសប្តាហ៍ទី០១ នៃខែ មករា ឆ្នាំ២០២៥ ចាប់ពីថ្ងៃទី០១ ដល់ថ្ងៃទី០៥ ខែមករា ឆ្នាំ២០២៥ ។ ដូចនេះខ្ញុំសូមស្នើដល់ឯកឧត្តមលោកជំទាវ លោក លោកស្រី ដែលជាប់កាតព្វកិច្ចប្រកាសទ្រព្យសម្បត្តិ និងបំណុលតាមរបប០២ឆ្នាំ ត្រូវទៅប្រកាសទ្រព្យ សម្បត្តិ និងបំណុលឲ្យបានទាន់ពេលវេលាតាមការបរិច្ឆេទកំណត់ខាងលើនៅអង្គភាពប្រឆាំងអំពើពុករលួយ ។

ក្នុងករណីឯកឧត្តម លោកជំទាវ លោកលោកស្រី មានការយឺតយ៉ាវឬពុំបានទៅប្រកាសទ្រព្យសម្បត្តិនិងបំណុល តាមកាលបរិច្ឆេទកំណត់ខាងលើនេះ សាម៉ីខ្លួនជាអ្នកទទួលខុសត្រូវទាំងស្រុងចំពោះមុខច្បាប់ ។ ចំពោះទម្រង់ នៃ ប្រកាសទ្រព្យសម្បត្តិ និងបំណុល ទម្រង់ឆ្នាំ២០១២ អាចទាញយកបានតាមគេហទំព័ររបស់អង្គភាពប្រឆាំងអំពើ ពុករលួយ www.acu.gov.kh ។

ឯកឧត្តម ហួន ច័ន្ទថុន បានបន្តថា សម្រាប់ព័ត៌មាននេះ រូបខ្ញុំសូមចែករំលែកព័ត៌មានជូនឯកឧត្តម លោកជំទាវ លោក លោកស្រី ដែលជាប់កាតព្វកិច្ចប្រកាសទ្រព្យនិងបំណុល សូមមេត្តាចាប់អារម្មណ៍ និងប្រញ៉ាប់ប្រញ៉ាល់ រូតរះឲ្យបានទាន់ពេលទាន់វេលា ទាំងអស់គ្នា ៕