ក្លាយជាការចាប់អារម្មណ៏ពីសំណាក់មហាជនយ៉ាងខ្លាំងហើយ ដោយគេបានឃើញចាប់ពីភូមិព្រែកដូនហែម រហូតដល់ភូមិព្រែកអំពិល ស្ថិតក្នុងសង្កាត់ព្រែកអំពិល ក្រុងអរិយក្សក្រ ខេត្តកណ្តាល ស្រាប់តែឃើញសំណង់រឹង យ៉ាងច្រើនត្រូវបានរីកចូលទៅក្នុងចំណីទន្លេយ៉ាងអនាធិបតេយ្យហើយរីកស្គុះស្គាយ ហើយដោយឡែកអាជ្ញាធរ ហាក់បីដូចជាមិនសូវចាប់អារម្មណ៍អ្វីសោះនោះដែរ ។

តាមប្រភព័ត៌មានបានឲ្យដឹងថា ទឹកដីក្រុងអរិយក្សត្រ បច្ចុប្បន្នកំពុងមានការអភិវឌ្ឍន៍យ៉ាងគគ្រឹកគគ្រេង ជាពិសេសវិស័យសំណង់រីកដុះដាលជាខ្លាំង ប៉ុន្តែកន្លែងខ្លះបានសាងសង់នៅលើដីចំណីព្រែកចំណីទន្លេ ដែលជាសម្បត្តិសាធារណៈរបស់រដ្ឋ ដោយការសាងសង់យ៉ាងអនាធិបតេយ្យបែបនេះ គេមិនដឹងថា ការសំណង់ទាំងអស់ នោះមានច្បាប់ ឬយ៉ាងណានោះទេ ប៉ុន្តែបើតាមច្បាប់ភូមិបាល នៃព្រះរាជាណាចក្រកម្ពុជា រាល់ដីចំណីទន្លេ និងសមុទ្រ គឺមិនអាចឲ្យមានសាងសង់សំណង់រឹងជាដាច់ខាត ។

ប្រភពព័ត៌មាននោះ បានលួចខ្សឹបប្រាប់អ្នកសារព័ត៌មានអោយដឹងថា រាល់ដីសម្បត្តិសាធារណៈរបស់ប្រជាជនគ្រប់រូប មានសិទ្ធិអាស្រ័យផលបណ្តោះអាសន្នបាន តែគ្មានសិទ្ធិសាងសង់សំណង់រឹងធ្វើជាកម្មសិទ្ធិផ្ទាល់ខ្លួនបាននោះទេ។ អញ្ចឹងបានន័យថា ការសាងសង់ទាំងនេះ វាគ្មានច្បាប់អនុញ្ញាត្តនោះទេ។ ហើយការសាងសង់បែបនេះ បើប្រជាជនស្លូតត្រង់មិនអាចធ្វើបានទេ វាទាល់តែអ្នកមានលុយ មានអំណាច ទើបធ្វើទៅរួច។

ទាក់ទិននឹងព័ត៌មានសំណង់រឹងយ៉ាងស្គុះស្គាយនេះ ប្រភពពីពលរដ្ឋជាច្រើនសំណូមពរសុំដល់ថ្នាក់ដឹកនាំគ្រប់ ជាន់ថ្នាក់ មេត្តាបើកការស៊ើបអង្កេតការសាងសង់សំណង់រឹងទាំងអស់នោះផងទាន ព្រោះបើតាមដែលពួកគាត់ ដឹងនោះ ម្ចាស់សំណង់ដែលកំពុងបំពានចូលទន្លេនេះ គឺជាអ្នកដែលមានលុយ និងជាឧកញ៉ាផងដែរ ៕