អង្គភាពប្រឆាំងអំពើពុករលួយ ហៅកាត់ថា (ACU)បានបញ្ជាក់ថា រយៈពេល៣០ថ្ងៃយ៉ាងយូរ នៅក្រោយការ ចូលកាន់មុខតំណែងសម្រាប់សមាជិកសភា សមាជិករាជរដ្ឋាភិបាល រដ្ឋលេខាធិការ អនុរដ្ឋលេខាធិការ ទី ប្រឹក្សា និងជំនួយការនៅក្នុងនីតិកាលទី៧ នៃរដ្ឋសភា សមាសភាពទាំងអស់នោះត្រូវតែប្រកាសទ្រព្យសម្បត្តិ និងបំណុល ។

យោងតាមលិខិតមួយ របស់អង្គភាពប្រឆាំងអំពើពុករលួយ ដែលបានចេញផ្សាយនៅថ្ងៃទី២៩ សីហា ឆ្នាំ ២០២៣ បានលើកឡើងថា មាត្រា១៨ : របបប្រកាសទ្រព្យសម្បត្តិ និងបំណុលនៃច្បាប់ស្តីពីការប្រឆាំងអំពើពុករលួយ : ទី១. សមាជិកសភា គឺរយៈពេល៣០ថ្ងៃយ៉ាងយូរ ក្រោយពីពេលចូលកាន់តំណែងត្រូវរាប់ចាប់ពីថ្ងៃពិធីប្រកាសសុពលភាព (ថ្ងៃទី២១ ខែសីហា ឆ្នាំ២០២៣) ។ សមាជិករាជរដ្ឋាភិបាល រដ្ឋលេខាធិការ អនុរដ្ឋ លេខាធិការ ទីប្រឹក្សា និងជំនួយការ គឺរយៈពេល៣០ថ្ងៃយ៉ាងយូរ ក្រោយពីពេលចូលកាន់តំណែង កំណត់ចាប់ពីថ្ងៃទទួលបានការតែងតាំងដោយព្រះរាជក្រឹត្យ ឬអនុក្រឹត្យ ។

ទី២. សមាជិកសភា សមាជិករាជរដ្ឋាភិបាល រដ្ឋលេខាធិការ អនុរដ្ឋលេខាធិការ ទីប្រឹក្សា និងជំនួយការថ្មី ដែលពីមុនមកមិនធ្លាប់ទទួលតួនាទីនេះ ហើយមិនធ្លាប់មានតួនាទីអ្វីផ្សេងទៀត ដែលជាប់កាតព្វកិច្ចប្រកាសទ្រព្យ សម្បត្តិ និងបំណុល ត្រូវអនុវត្តការប្រកាសទ្រព្យសម្បត្តិ និងបំណុល ក្នុងរយៈពេល៣០ថ្ងៃយ៉ាងយូរ ក្រោយពីចូលកាន់មុខតំណែង ។

ទី៣ : សមាជិកសភា សមាជិករាជរដ្ឋាភិបាល រដ្ឋលេខាធិការ អនុរដ្ឋលេខាធិការ ទីប្រឹក្សា និងជំនួយការចាស់ ដែលត្រូវបានជាប់ឆ្នោតជាថ្មី ឬទទួលបានការតែងតាំងជាថ្មី មិនចាំបាច់ធ្វើការប្រកាសទ្រព្យសម្បត្តិ និងបំណុលនៅក្នុងរយៈពេល៣០ថ្ងៃ ក្រោយការចូលកាន់មុខតំណែងនាពេលនេះទេ ហើយត្រូវធ្វើការប្រកាសទ្រព្យសម្បត្តិ និងបំណុល តាមរបប០២ឆ្នាំ គឺនៅខែមករា ឆ្នាំ២០២៤ សម្រាប់អ្នកដែលបានប្រកាសទ្រព្យសម្បត្តិ និងបំ ណុលនៅក្នុងឆ្នាំ២០២២ និងនៅខែមករា ឆ្នាំ២០២៥ សម្រាប់អ្នកដែលបានប្រកាសទ្រព្យសម្បត្តិ និងបំណុល នៅក្នុងឆ្នាំ២០២៣ ។

ទី៤. សមាជិកសភា សមាជិករាជរដ្ឋាភិបាល រដ្ឋលេខាធិការ អនុរដ្ឋលេខាធិការ ទីប្រឹក្សា និងជំនួយការអាណត្តិចាស់ (ទី៦) ដែលមិនឈរឈ្មោះជាបេក្ខជនជាថ្មី មិនបន្តអាណត្តិថ្មីលាឈប់ ឬមិនទទួលបានការតែងតាំង ហើយមិនមាននៅសល់មុខងារអ្វីផ្សេងទៀតដែលជាប់កាតព្វកិច្ចប្រកាសទ្រព្យសម្បត្តិ និងបំណុលត្រូវធ្វើការប្រកាសទ្រព្យសម្បត្តិ និងបំណុលជាលើកចុងក្រោយក្នុងអំឡុងពេល៣០ថ្ងៃយ៉ាងយូរ ក្រោយពីត្រូវបានបញ្ចប់តួនាទី ៕