បន្ទាប់ពីមានអ្នកសារព័ត៌មានជាច្រើនអង្គភាព ក្នុងនោះក៏មានអង្គភាពព័ត៌មានយើងផងដែរនោះ ដែលបានធ្វើការ ចេញផ្សាយពីប្រភពរាយការណ៌របស់ប្រជាពលរដ្ឋក្នុងស្រុកអូរយ៉ាវដាវ ដោយលើកឡើងថា កន្លងមកថ្មីៗនេះ គេ បានឃើញមេឈ្មួញបទល្មើសនៅតែបន្តធ្វើសកម្មភាពប្រមូលទិញឈើខុសច្បាប់ពីស្រុកវើនសៃ យកទៅលក់នៅ ប្រទេសវៀតណាមតាមច្រកទ្វារអន្តរៈជាតិអូរយ៉ាដាវនេះជាហូរហែរ ហើយអស់រយៈពេលជាច្រើនថ្ងៃមកនេះ មហាជនជាច្រើនក៏បាននឹងកំពុងធ្វើការតាមដានយ៉ាងយកចិត្តទុកដាក់ជាខ្លាំងថា តើនៅទីបំផុតក្នុងនាមជាអាជ្ញាធរ ថ្នាក់ខេត្ត រូបលោក ញ៉ែម សំអឿន លោកនឹងមានប្រតិកម្ម ដោះស្រាយបែបណា ។

ទោះជាយ៉ាងណាគេក៏តែងឃើញរូបលោក ញ៉ែម សំអឿន អភិបាល នៃគណៈអភិបាលខេត្ត ប្រកាសលើកឡើងថា ក្នុងទឹកដីខេត្តរតនគិរីគឺលែងមានបទល្មើសឈើខុសច្បាប់ធ្វើសកម្មភាពដឹកជញ្ជូនចល័តដូចមុន ដូចបណ្តាអ្នកសារ ព័ត៌មានផ្សព្វផ្សាយទៀតហើយ លើសពីនេះរូបលោកក៏ធ្លាប់បានលើកឡើងផងដែរថា សុំឲ្យអ្នកសារព័ត៌មានធ្វើ យ៉ាងណាជួយផ្សាយនូវព័ត៌មានអ្វីដែលពិតប្រាកដ និងមិនត្រូវធ្វើការផ្សាយព័ត៌មានណាដែលក្លែងក្លាយ ហើយត្រូវ ប្រមូលព័ត៌មានឲ្យបានគ្រប់ជ្រុងជ្រោយ ។ ដោយឡែកនៅពេលថ្មីៗ ប្រភពពីពលរដ្ឋដោយសុំកុំឲ្យបញ្ចេញឈ្មោះ បានរាយការណ៌ឲ្យដឹងថា នៅក្នុងស្រុកវើនសៃ ខេត្តរតនគិរី បែរជាលេចធ្លាយព័ត៌មានថា កំពុងតែមានក្រុមបុគ្គល ឈ្មួញខិលខូចសហការគ្នាប្រព្រឹត្តបទល្មើសនាំឈើខុសច្បាប់ ទៅប្រទេសវៀតណាម យ៉ាងរលូនជាបន្តបន្ទាប់ ទៅវិញ ហើយសម្រាប់សមត្ថកិច្ចជំនាញពាក់ព័ន្ធ ក៏ត្រូវបាននាំគ្នារក្សាការស្ងៀមស្ងាត់យ៉ាងចម្លែកផងដែរ ។

ក្រុមឈ្មួញរកស៊ីកាប់បំផ្លាញព្រៃឈើដែលកំពុងល្បីឈ្មោះនោះ ត្រូវបានគេដឹងថា មានបុរស២រូបដែលជាជើងខ្លាំង ដុះស្លែ គឺទី១ឈ្មោះ មករា និងទី២ឈ្មោះ ងួន វណ្ណា ហៅអូនធំ អ្នកទាំងពីរនេះកាលពីប៉ុន្មានឆ្នាំមុន ក៏ជាឈ្មួញ និង អតីតជាមន្ត្រីដែលមានភាពប៉ិនប្រសប់ក្នុងការរករបរឈើខុសច្បាប់នេះ ប៉ុន្តែដោយមានបទបញ្ជាពីថ្នាក់ដឹកនាំឲ្យ ទប់ស្កាត់បទល្មើសយ៉ាងតឹងរឹង ក្រុមឈ្មួញបទល្មើសទាំងពីរនាក់ក៏បានរក្សា ការស្ងប់ស្ងាត់អស់រយៈពេលជាច្រើនឆ្នាំ ទើបតែនៅពេលថ្មីៗនេះទេ ទើបបែកធ្លាយកេរ្តិ៍ឈ្មោះបុគ្គលទាំងពីរសារជាថ្មី ។

ទោះជាបែបណា នៅក្រោយពេលបណ្តាញអ្នកសារព័ត៌មានចេញផ្សាយយ៉ាងគគ្រឹកគគ្រេងផងនោះ មតិមជ្ឈដ្ឋាន នៅក្នុងខេត្តរតនគិរី សង្ឃឹមថា រូបលោក ញ៉ែម សំអឿន ក្នុងនាមជាអភិបាល នៃគណៈអភិបាលខេត្ត រូបលោក អាចនឹងមានចំណាត់ការទប់ស្កាត់ការរីករាល់ដាលបទល្មើសឈើខុសច្បាប់នេះ ឲ្យបានជាស្ថាពរផងទាន ពីព្រោះ ព្រៃឈើគឺជាជម្រកធនធានមួយដែលកម្រកើតមានឡើងវិញណាស់ ៕