ក្លាយជាការភ្ញាក់ផ្អើលពេញបណ្តាញសង្គមតែម្តង ខណៈដែលគេបានឃើញរថយន្តយីឌុបជាច្រើនគ្រឿង បាន ដឹកទំនិញគេចពន្ធយ៉ាងច្រើន ទៅទម្លាក់នៅជិតប៉ុស្ត៍ការពារព្រំដែនច្រករបៀងទួលស្តី ហើយលើកដាក់ទូកឆ្លងដែនទៅប្រទេសវៀតណាម ដោយគេមិនឃើញមានសមត្ថកិច្ចណាចុះអើពើរំខានសោះឡើយ។ ជាក់ស្តែងដូច ជាករណីមួយ បានកើតឡើងនៅវេលាម៉ោង៣ និង១៥នាទីរសៀល ថ្ងៃទី១៩ ធ្នូ ២០២២ នៅចំណុចច្រកទ្វារព្រំដែន នៃច្រករបៀងទួលស្តី ស្ថិតនៅភូមិទួលស្តី ឃុំទួលស្តី ស្រុកចន្ទ្រា ខេត្តស្វាយរៀងនេះតែម្តង ។

ប្រភពពីពលរដ្ឋរស់នៅក្នុងភូមិទួលស្តីបានឲ្យដឹងថា មានរថយន្តយីឌុបធុនយក្សជាច្រើនគ្រឿង និងរថយន្តទ្រុងបិទជិតបានដឹកទំនិញ ដែលគេសង្ស័យថាជាទំនិញគេចពន្ធ បានមកដាក់នៅជិតប៉ុស្ត៍ច្រករបៀងទួលស្តី ក្នុងមួយថ្ងៃៗពី៥ទៅ៦គ្រឿង ដែលមានដូចជា ស្ករស បារី និងទំនិញជាច្រើនមុខផ្សេងទៀត ត្រូវគេដាក់ក្នុងទៃបិទយ៉ាងជិតមិនអាចដឹងថាជាទំនិញអ្វី បានដាក់ចូលក្នុងឃ្លាំងនិងក្រៅឃ្លាំងតាមបណ្តោយផ្លូវ មាត់ប្រឡាយប្រវែង១,០០០ម៉ែត្រ ដោយមានឃ្លាំងជាច្រើន។ ក្នុងនោះគេឃើញទូកភាសារវៀតណាមហៅថា តឹកយ៉ាង ភាសារខ្មែរ គេហៅថាទូកស្មាច់ ចំណុះ១តោន ទៅ៣តោន ទូកវៀតណាមឆ្លងដែនចូលមកដីខ្មែរគគ្រឹកគគ្រេង ដូចគេហែកឋិន ឮស្នូរសម្លេងម៉ាស៊ីនទ្រហឹង ចាប់ពីម៉ោង៣រសៀលរហូតដល់យប់អធ្រាត្រជិតភ្លឺ ដោយគ្មានរំខានដល់សមត្ថកិច្ចណាឡើយ។

មហាជនបានលើកឡើងទៀតថា រថយន្តដឹកទំនិញទាំងនេះបានបំផ្លាញផ្លូវលំ ប្រវែងប្រជិត៤គីឡូម៉ែត្រនៅរដូវវស្សា គឺក្លាជារណ្តៅ ជង្ហុកសំបុកមាន់និងបែកល្បាប់ពិបាកធ្វើដំណើរយ៉ាងខ្លាំង ដោយពលរដ្ឋសង្ឃឹមថា នៅពេលខែប្រាំងរាំងភ្លៀងនេះខាងអាជ្ញាធរអាចនឹងឈូសឆាយផ្លូវឲ្យធ្វើដំណើរបានស្រួលវិញ ក៏ប៉ុន្តែបើរថ យន្តធុនយក្សដឹកទំនិញបើកបរបំផ្លាញផ្លូវរាល់ថ្ងៃ ហុយធូលីឲ្យសំពោងពេញផ្ទះបង្កឲ្យប៉ះពាល់ដល់សុខភាពកូនចៅពួកគាត់តែយ៉ាងចឹង តើឲ្យពួកគាត់ទ្រាំបានដូចម្តេចទៅ ។

ទាក់ទិននឹងព័ត៌មានខាងលើនេះ លោក អឿន មេប៉ុស្ត៍ច្រករបៀងទួលស្តី អង្គភាពព័ត៌មានយើង នៅមិនអាច សុំការបំភ្លឺបាននៅឡើយទេ ព្រោះមិនអាចស្វែងរកលេខទំនាក់ទំនង នៅថ្ងៃនេះ ៕