នៅតែមិនអាចមើលស្រាលបានពិតមែនបងៗជនជាតិចិន ដែលរស់នៅ និងប្រកបអាជីវកម្មនៅលើទឹកដីកម្ពុជា យើង ជាក់ស្តែងណាស់កាលពីពេលថ្មីៗនេះ រឿងរ៉ាវដ៏ព្រឺព្រួចរបស់បងៗជនជាតិចិន ត្រូវបានសមត្ថកិច្ចអាវុធហត្ថ បង្ក្រាប ធ្វើភ្ញាក់ផ្អើលសារជាថ្មី ក្នុងបណ្តាញសង្គមហ្វេសប៊ុក ។

គួរបញ្ជាក់ថា ដោយមានការសម្របសម្រួលនីតិវិធីពី លោក សៀង សុខ ព្រះរាជអាជ្ញា អមសាលាដំបូងខេត្តព្រះ សីហនុ កម្លាំងកងរាជអាវុធហត្ថខេត្ត និងកម្លាំងស្នងការដ្ឋាននគរបាលខេត្តព្រះសីហនុ ផងនោះ គឺបានចុះបង្រ្កាប ករណីជនជាតិចិន ចាប់ជំរិតជនជាតិចិន ១ករណី នៅក្រុងព្រះសីហនុ កាលពីវេលាម៉ោងជាង ៨ល្ងាច ថ្ងៃសុក្រ ទី១០ ខែ កញ្ញា ឆ្នាំ២០២១ នេះ។

ក្នុងនោះបើតាមផេកផ្លូវការរបស់បញ្ជាការដ្ឋានអាវុធហត្ថខេត្តព្រះសីហនុ បានបញ្ជាក់ថា លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ បានដឹកនាំកម្លាំងកងរាជអាវុធហត្ថខេត្ត ចំនួន ៣០នាក់ សហការជាមួយកម្លាំងស្នងការនគរបាលខេត្ត និងដោយមានការសម្របសម្រួលផ្នែកនីតិវិធីពី ឯកឧត្តម សៀង សុខ ព្រះរាជអាជ្ញា នៃអយ្យការអមសាលាដំបូងខេត្ត ចុះបង្ក្រាបករណី ចាប់ឃុំឃាំង និងបង្ខាំងដោយខុសច្បាប់ ជំរិតទារ ប្រាក់ និងបទកាន់កាប់ ប្រើប្រាស់អាវុធគ្មានការអនុញ្ញាត នៅចំណុចសណ្ឋាគារស៊ីហាវ យ៉ិងហ៊ួយ ស្ថិតក្នុងក្រុមទី ១៣ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។

នៅក្នុងប្រតិបត្តិការបង្រ្កាបខាងលើនេះ សមត្ថកិច្ចជំនាញ បានរំដោះជនរងគ្រោះ ចំនួន ០១នាក់ ភេទប្រុស (ជនជាតិ ចិន) និងឃាត់ខ្លួនជនសង្ស័យប្រុស ស្រី ចំនួន ១៤នាក់ (ស្រី០១នាក់) ។ ព្រមទាំងបានរឹបអូសវត្ថុតាងមួយចំនួនដែល
មាន ១/ អាវុធវែង ចំនួន ០១ដើម ម៉ាក AK47 ពណ៌ខ្មៅ។ បង់ ចំនួន០២ ។ គ្រាប់ ចំនួន ៦៥គ្រាប់ ។ ២/ អាវុធវែង ចំនួន ០១ដើម ម៉ាក M4 ពណ៌ខ្មៅ ។ បង់ ចំនួន០១, គ្រាប់ ចំនួន ៣០គ្រាប់ ។ ៣ អាវុធខ្លី ចំនួន ០២ដើម ម៉ាក K54 ពណ៌ខ្មៅ បង់ចំនួន ០២ ។ ៤ អាវុធខ្លី ចំនួន ០១ដើម ម៉ាក K59 ពណ៌ខ្មៅ បង់ ចំនួន ០១ ។ ៥/ អាវុធខ្លី ចំនួន ០១ ដើម ម៉ាក CF98 ពណ៌ខ្មៅ, បង់ ចំនួន ០១ ។ ៦/ អាវុធខ្លី ចំនួន ០១ដើម ម៉ាក RoLo ពណ៌ស គ្រាប់ ចំនួន ០៤គ្រាប់
។ ៧/ គ្រាប់អាវុធខ្លីចម្រុះមួយចំនួន ។ ៨/ រថយន្ត ចំនួន ០១គ្រឿង ម៉ាក TOYOTA ALPHARD ពណ៌ខ្មៅ ពាក់ស្លាក លេខ ភ្នំពេញ 2P-0199 បច្ចុប្បន្ន កម្លាំងការិយាល័យជំនាញ បានបញ្ជូនជនសង្ស័យ រួមនឹងវត្ថុតាង មកកាន់បញ្ជា ការដ្ឋានកងរាជអាវុធហត្ថខេត្ត ដើម្បីចាត់ការបន្តនីតិវិធី ។


នេះជារឿងរ៉ាវដ៏ចាប់អារម្មណ៌ថ្មីមួយទៀតហើយក្នុងសង្គម ដែលធ្វើសកម្មភាព ដោយបងៗជនជាតិចិន ៕