សមត្ថកិច្ចនិងប្រជាពលរដ្ឋមួយភូមិ នាំគ្នាដេញព័ទ្ធចាប់ជនដៃដល់ម្នាក់ ប្រើកាំបិតផ្គាក់ កាប់ក្មេងប្រុសម្នាក់អាយុទើបតែ១ឆ្នាំកន្លះ ត្រូវចំនួន២កន្លែងបណ្តាលឲ្យស្លាប់ភ្លាមៗ ។ ហេតុការណ៍ដ៏រន្ធុតមួយនេះ បានកើតឡើងនៅ
វេលម៉ោងជាង១រសៀល ថ្ងៃទី១៤ ខែមីនា ឆ្នាំ២០២១ នៅក្នុងភូមិអំពិលផ្អែម ឃុំរលាំងចក ស្រុកសំរោងទង ខេត្ត កំពង់ស្ពឺ ។

តាមប្រភពនៅកន្លែងកើតហេតុបានឲ្យដឹងថា ក្មេងប្រុសរងគ្រោះឈ្មោះ ភួង សុខណាន់ អាយុ១ឆ្នាំកន្លះ រស់នៅក្នុងភូមិ ឃុំខាងលើត្រូវជាកូនរបស់ឈ្មោះ ឃុន ស្រីនាង អាយុ២៥ឆ្នាំ រស់នៅភូមិឃុំខាងលើ នេះតែម្តង ។ ចំណែក ឯជនដៃដល់ឈ្មោះ អៀង រ៉ាដូ ភេទប្រុស អាយុ៤៦ឆ្នាំ មានទីលំនៅក្នុងភូមិ ឃុំជាមួយគ្នា ។

បើសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះដែលបានបាត់បងជីវិតនេះ ត្រូវបានឈ្មោះ តុញ ភេទស្រី អាយុ៧ឆ្នាំ ជាក្មួយស្ដ្រីជាម្ដាយជនរងគ្រោះ ពដើរលេង នៅម្តុំមុខផ្ទះជនល្មើស ស្របពេលនោះ ជនល្មើសបានកាន់កាំបិតផ្គាក់ចេញពីក្នុងផ្ទះ រួចរត់សំដៅមកកាប់ជនរងគ្រោះបណ្តាលឲ្យស្លាប់ហ្នឹងកន្លែងតែម្តង ។ ហើយបើ តាមស្លាកស្នាមកាប់ត្រូវ ក ខាងស្តាំ និងលើថ្ងាស ។

ក្រោយធ្វើសកម្មភាពរួចហើយ ជនល្មើសបានរត់ចូលក្នុងផ្ទះបិតទ្វារ ដោយធ្វើសកម្មភាពដុតផ្ទះ ដោយឃើញ ហេតុការណ៌បែបនេះ ប្រជាពលរដ្ឋនិងសមត្ថកិច្ច បានចុះឡោមព័ទ្ធ និងមានកិច្ចអន្ដរាគមន៍បន្ទាន់ពីក្រុមរថយន្ដសង្គ្រោះអគ្គិភ័យ អធិការដ្ឋាននគរបាលស្រុកសំរោងទង និងរថយន្ដរបស់ស្នងការដ្ឋាននគរបាលខេត្ត កំពង់ស្ពឺ ប៉ុន្តែជនល្មើសបានសម្ងំលាក់ខ្លួនមិនព្រមចេញ ជាក់ស្តែងដោយស្ថានភាពមិនល្អជំនាញ បានស្នើសុំយោបល់សម្រេចប្រើប្រាស់មធ្យោបាយអាវុធដែលបំពាក់ក្បាលគ្រាប់បែកផ្សែងពុល ដើម្បីចូលចាប់ជនល្មើស។

ហើយនៅទីបំផុត សមត្ថកិច្ច និងប្រជាពលរដ្ឋចាប់ជនល្មើស រួចបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចំណាត់ការ តាមផ្លូវច្បាប់ ហើយ ។

នេះជារឿងរ៉ាវនៅក្នុងសង្គម មិនគួរនឹងកើតមានឡើង ៕