ពិតជាគួរឲ្យអាសូរសម្បត្តិធម្មជាតិយ៉ាងខ្លាំង យ៉ាងណាមិញភ្នំទទា ដែលជាភ្នំដ៏ស្រស់បំព្រង ស្ថិតនៅក្នុងភូមិស្ដុក ឃុំកុមាររាជា ស្រុកបាទី ខេត្តតាកែវ កំពុងបានក្រុមឈ្មួញជីកគាស់កកាយភ្នំស្ទើរតែរំលើងភ្នំទៅហើយ ពោលគឺ អាចនឹងរលាយហិនហោចបាត់រូបរាង លែងបន្សល់ទុកឲ្យកូនខ្មែរជំនាន់ក្រោយបានឃើញទៀត ដោយសារតែ ក្រុមឈ្មួញទុច្ចរិតមួយចំនួន យកគ្រឿងចក្រគ្រប់ប្រភេទមកជីកធ្វើអាជីវកម្ម ដើម្បីយកលុយធ្វើមានធ្វើបានប្រ យោជន៌របស់គេ ។

ប្រភពពីប្រជាពលរដ្ឋក្នុងស្រុកបាទី បានប្រាប់ឲ្យដឹងថា ករណីដីភ្នំទទាមួយទាំងមូលគ្រោងនឹងជិតរំលើងអស់នេះ
គេ នៅមិនទាន់ដឹងថា មានបុគ្គលមានអំណាចណាខ្លះនៅពីក្រោយខ្នងនោះទេ ប៉ុន្តែអ្វីដែលប្រជាពលរដ្ឋបាន ឃើញ និងព្រួយបារម្ភរាល់ថ្ងៃនេះ គឺក្រុមឈ្មួញនាំគ្នាមកធ្វើអាជីវកម្មជីកកកាយយកអាចម៍ដី ជារៀងរាល់ថ្ងៃ យ៉ាងអនាធិបតេយ្យ និងមានការសុខសាន្តយ៉ាងល្អណាស់ ។

ក្នុងនោះដែរ មន្ទីរជំនាញពាក់ព័ន្ធក្នុងខេត្តតាកែវទាំងមូល ដូចជាមន្ទីរបរិស្ថាន និងមន្ទីររ៉ែ និងថាមពល ក៏ហាក់ បីដូចជាមិនធ្លាប់ឃើញមានការចុះត្រួតពិនិត្យអ្វីសោះនោះដែរ ក្លាយជាមន្ទិល និងការងឿងឆ្ងល់របស់ប្រជាពល រដ្ឋជាច្រើនលើឡើងថា តើមូលហេតុអ្វីបានជាសកម្មភាពកាយរំលើងភ្នំមួយទាំងមូល មន្ត្រីថ្នាកដឹកនាំ និងជំនាញ ពាក់ព័ន្ធក្នុងខេត្ត មានការស្ងាត់ស្ងៀមល្អម៉្លេះ ។

ទោះជាយ៉ាងណា ប្រជាពលរដ្ឋរស់នៅក្នុងស្រុកបាទី ខេត្តតាកែវ សូមសំណូមពរដល់ ថ្នាក់ដឹកនាំកំពូលៗទាំង អស់ សូមមេត្តាជួយអាណិតអាសូរដល់សម្បត្តិធនធានធម្មជាតិមួយនេះ ទុកឲ្យកូនខ្មែរជំនាន់ក្រោយ បានស្គាល់ ខ្លះៗផងទានម្ចាស់ ៕