អស់រយៈពេលជាច្រើនខែណាស់មកហើយ ដែលអាជ្ញាធរស្រុកខេត្ត ក្នុងនោះសូម្បីតែថ្នាក់ដឹកនាំកំពូលៗគ្រប់ជាន់ ថ្នាក់ក៏នៅមិនទាន់ឃើញអស់លោករូបណា បានកម្រើកអើពើសោះនៅឡើយទេ ករណីបន្តឹងរបស់លោក គង់ រី តំណាងសហគមន៌កាំងចាម ដែលបានប្តឹងសុំឲ្យថ្នាក់ដឹកនាំកំពូលៗ មានចំណាត់ការបែបក្តៅទៅលើបុគ្គលលោក ឃឹម សុខា មេឃុំកាំងចាម ក្នុងករណីរូបលោកនៅពីក្រោយខ្នងឲ្យមនុស្សចូលកាប់ព្រៃទន្ទ្រានយកដី ក្នុងព្រៃសហ គមន៌ និងព្រៃឡង់ កន្លងមក ។

បើតាមការលើកឡើងពីរូបលោក គង់ រី តំណាងសហគមន៌ការពារព្រៃឈើកាំងចាម បានអះអាងថា ភាពយុត្តិធម៌ រវាងសហគមន៌ និងរូបលោក ឃឹម សុខា ជាមេឃុំកាំងចាម គឺនៅមិនទាន់បានឃើញលទ្ធផលការដោះស្រាយពីថ្នាក់ដឹកនាំគ្រប់លំដាប់ថ្នាក់នៅឡើយទេ ។

លោក គង់ រី បានប្រាប់ថា នៅក្រោយពេលដែលរូបលោក និងតំណាងដ៏ទៃទៀតចំនួន៦នាក់ បានដាក់ពាក្យបណ្តឹង ទៅរដ្ឋសភា ព្រឹទ្ធសភា រួចហើយនោះកន្លងមកបានឃើញមន្ត្រីអង្គភាពប្រឆាំងអំពើពុករលួយ និងខាងមន្ត្រីបរិស្ថានពួកគាត់ចុះមកជួបក្រុមការងាររបស់លោកទាំង៦នាក់នេះហើយផងដែរ ហើយនៅពេលនោះដែរ លោក ឃឹម សុខា បានឆ្លើយជាមួយរូបលោកថា ដីដែលកាប់នោះមិនមែនជាដីព្រៃឡង់នោះទេ ។

ក្រោយមកទៀតលោកអភិបាល នៃគណៈអភិបាលស្រុក ហើយនិងរដ្ឋបាលព្រៃឈើ មន្ត្រីបរិស្ថានខេត្ត រួមនិងក្រុមអធិការៈកិច្ចផងនោះ ពួកគាត់ចូលរួមចុះត្រួតពិនិត្យនៅកន្លែងតំបន់កើតហេតុសារជាថ្មី ឃើញថា វាមានប៉ះពាល់ដីព្រៃឡង់ ដីរដ្ឋ រួមនិងដីសហគមន៌របស់លោកទៀតផង ។ ក្នុងពេលនោះលោក មេឃុំគាត់បានសួរលោកថា ក្រុមសហគមន៌បាននាំគ្នាប្តឹងរូបគាត់នេះតើមានអ្វីជាសំអាងថារូបគាត់លក់ដី ។

លោក គង់ រី បានបន្តថា នៅពេលនោះរូបលោកក៏បានយកភស្តុតាងទៅបង្ហាញគាត់ ដែលមានដូចជាស៊ីញ៉េក្តី មានរូបភាពក្តី ជាមួយបងប្អូនចាមនោះ ហើយជាក់ស្តែងលោកអភិបាលស្រុក ក៏បានចុះទៅសម្ភាសន៌សួរបងប្អូនចាមផងដែរ ដោយបងប្អូនពលរដ្ឋចាមបានឆ្លើយថា ដីនេះអត់មានទិញទេ គេឲ្យនៅទេ ដោយពួកគាត់ឲ្យលុយគេតិចតួចនោះទេ ហើយលោកអភិបាលស្រុកសួរថា តើឲ្យគេប៉ុន្មាន ពេលនោះពួកគាត់ថា អ្នកខ្លះឲ្យ១០០០ដុល្លា ដែលមានក្បាលដី៥០ម៉ែត្រ បណ្តោយ១០០០ម៉ែត្រ ហើយអ្នកខ្លះបានឲ្យទៅ៧០០ដុល្លា អ្នកខ្លះឲ្យទៅ៨០០ដុល្លា និងអ្នកខ្លះឲ្យទៅ ៩០០ដុល្លា ។

លោក គង់ រី តំណាង សហគមន៌ការពារព្រៃឈើ បានបញ្ជាក់ថា ដោយឡែករូបគាត់បានសួរទៅក្រុមបងប្អូនចាម ទាំងអស់នោះ ដោយសួថា តើលុយទាំងអស់នឹងឲ្យតាមរយៈអ្នកណា ចំណែកបងប្អូនចាមទាំងអស់នោះឆ្លើយថា ឲ្យតាមរយៈឈ្មោះម៉ាត់ ហ៊ីម តែខាងលោកសួរថា បើម៉ាត់ហ៊ីម ស្លាប់បាត់ទៅហើយ តើឲ្យតាមរយៈអ្នកណា ឬក៏ឲ្យឈ្មោះ ម៉ាត់ ហ៊ីម ផុសចេញពីក្នុងដី មកទទួលយក ឬក៏យ៉ាងម៉េច ។



ស្រាប់តែបានមួយសន្ទុះក្រោយមក បងប្អូនចាមទាំងនោះ មិនឲ្យខាងបងទៅឈរជិតពួកគេទៀតទេ ដោយពួកគេឈរនៅជាក្រុម ជាមួយនឹងលោក ឃឹម សុខា មេឃុំរូបនោះតែម្តង ។ ស្របពេលនោះ លោកអភិបាលស្រុក ក៏បានបញ្ជាឲ្យមន្ត្រីបរិស្ថានយកទូរស័ព្ទរបស់លោកដែលបានថតសម្លេងរបសបងប្អូនចាមទាំងនោះ លុបចោល អស់តែម្តងទៅ ហើយជាក់ស្តែង ចាប់តាំងពីនោះមក គឺមិនធ្លាប់ឃើញថ្នាក់ដឹកនាំណាមានចំណាត់ការសោះនោះទេ គឺស្ងាត់ជ្រងំរហូតមកដល់ពេលនេះតែម្តង ។

ទោះជាបែបណា រូបលោក ក៏ដូចជាតំណាងសហគមន៌ដ៏ទៃទៀត សូមសំណូមពរដល់ថ្នាក់ដឹកនាំគ្រប់លំដាប់ ថ្នាក់ជួយមានចំណាត់ការទប់ស្កាត់ផង ព្រោះនៅពេលនេះ មានមនុស្សចូលកាប់ព្រៃសហគមន៌របស់លោករាល់ថ្ងៃ ពោលគឺគ្មានស្រាកស្រានសោះនោះឡើយ ។

សូមបញ្ជាក់ថា នៅក្នុងរយៈពេលជាច្រើនថ្ងៃមកនេះ ចាប់តាំងពីចុងខែវិច្ឆិកា រហូតមកដល់ពេលនេះ គេបានឃើញថ្នាក់ដឹកនាំជាច្រើន បានធ្វើការខិតខំយ៉ាងស្វិតស្វាញខ្លាំងណាស់ ក្នុងការចុះស្រាវជ្រាវរកអត្តសញ្ញាណជននៅពីក្រោយខ្នងការទន្ទ្រានយកដីព្រៃ ឬក៏ដីរដ្ឋទៅផ្តន្ទាទោសជាបន្តបន្ទាប់ ដោយឡែកទឹកដីស្រុកថាឡាបរិវ៉ាត់ ខេត្តស្ទឹងត្រែង ដែលតែងល្បីល្បាញរឿងរ៉ាវដីធ្លី គេនៅមិនទាន់ឃើញប្រមុខរាជរដ្ឋាភិបាល លោកបានអើពើនៅឡើយទេ ។

សូមបញ្ជាក់ផងដែរថា សម្រាប់ព័ត៌មានដ៏រសើបនេះ ក្រុមការងារអ្នកយកព័ត៌មានបានព្យាយាមទំនាក់ទំនង រូបលោក ឃឹម សុខា មេឃុំកាំងចាមជាច្រើនលើកច្រើនសារ ដើម្បីសុំការបំភ្លឺបន្ថែមតាមវិជ្ជាជីវៈអ្នកសារព័ត៌មាន ប៉ុន្តែទូរស័ព្ទរបស់លោកខលចូលហើយ មិនមានអ្នកទទួលនោះឡើយ ៕