មានរឿងអកុសលមួយកើតឡើងលើក្មេងប្រុសអាយុ៣ខែ ខណៈដែលឪពុកម្តាយបាននាំយកទៅឲ្យគ្រូពេទ្យឯកជន ព្យាបាល ហើយនៅទីបំផុតកូនប្រុសរបស់គាត់ត្រូវបានសម្លាប់ នៅទីបំផុតគ្រូពេទ្យរូបនោះ បានព្យាយាមគេច វេស មិនទទួលខុសត្រូវ ទើបត្រូវបានសមត្ថកិច្ចឃាត់ខ្លួន តាមបណ្តឹងរបស់ឪពុកម្តាយកុមាររងគ្រោះ ។

ហេតុការណ៌ដ៏ភ្ញាក់ផ្អើលនេះ បានកើតឡើងនៅ វេលាម៉ោង៧ និង០០នាទី ថ្ងៃទី២៧ ខែកញ្ញា ឆ្នាំ២០២០ នៅផ្ទះ ពេទ្យឯកជនមួយ ដែលមានឈ្មោះ ផាត់ ពិទូរ្យ ជាគ្រូពេទ្យព្យាបាល ដែលមានទីតាំងស្ថិតនៅភូមិសំបូរ ឃុំសំបូរ ស្រុក សំបូរ ខេត្តក្រចេះ ។

បើតាមសេចក្តីរាយការណ៌បានឲ្យដឹងថា នៅព្រឹកថ្ងៃទី២៧ ខែកញ្ញា ឆ្នាំ២០២០ នេះ ព្រោះតែកុមារឈ្មោះ រ៉ង ពិសិទ្ធ អាយុ៣ខែ ភេទប្រុស មានជម្ងឺ ត្រូវបានឈ្មោះ ហ៊ន បុណ្ណារិទ្ធ និងប្រពន្ធ ដែលជាឪពុកម្តាយ ដែលមានទី តាំងភូមិទន្សោងធ្លាក់ ឃុំកំពង់ចាម ស្រុកសំបូរ បានយកមកព្យាបាលនៅពេទ្យឯកជន វេជ្ជបណ្ឌិត ឈ្មោះ ផាត់ ពិទូរ្យ ។

នៅពេលយកកូនមកដល់ផ្ទះពេទ្យភ្លាម គ្រូពេទ្យបានពិនិត្យថា កូនរបស់គាត់ មានអាការ:មានស្លេះរុំទងសួត ហើយលោកគ្រូពេទ្យ បានយកកូនរបស់គាត់ទៅដាក់ម៉ាស៊ីនឆ្ពុង ដើម្បីឲ្យស្រួលដកដង្ហើម តែពេលនោះឪពុកឈរ មើលឃើញកូនបញ្ឈរភ្នែក ក៏ប្រាប់គ្រូពេទ្យឲ្យឈប់ឆ្ពុងទៅ ព្រោះកូនគាត់បញ្ឈរភ្នែកហើយ ពេលនោះពេទ្យឆ្លើយ ថាមិនអីទេ នៅពេលគ្រូពេទ្យកំពុងតែឆ្ពុង កូនរបស់គាត់បានដាច់ខ្យល់ស្លាប់តែម្ដងទៅ ។

ពេលកូនរបស់គាត់ស្លាប់ លោកគ្រូពេទ្យ ផាត់ ពិទូរ្យ អត់ទទួលខុសត្រូវ ហើយថែមនិយាយថា ចង់ទៅប្ដឹងពីណា ទៅប្ដឹងទៅ គាត់ទទួលខុសត្រូវចំពោះមុខច្បាប់ ។ ក្រោយពីគ្រូពេទ្យឈ្មោះ ផាត់ ពិទូរ្យ និយាយរួចហើយ បុរសជា ឪពុក និងម្តាយកុមាររងគ្រោះ ក៍បីកូនដែលស្លាប់នោះ មកដាក់ពាក្យបណ្ដឹងនៅអធិការដ្ឋាននគរបាលស្រុកសំបូរ ដើម្បីឲ្យសមត្ថកិច្ច ជួយរកយុត្តិធម៏ដល់កូនរបស់គាត់ និងចាត់ការតាមនីតិវិធីច្បាប់ ។

ជាក់ស្តែង លុះដល់វេលាម៉ោង១២ និង៥នាទី តាមបញ្ជារលោក កែវ សុជាតិ ព្រះរាជអាជ្ញាបានបញ្ជាឲ្យធ្វើការ ឃាត់ខ្លួនលោកគ្រូពេទ្យឈ្មោះ ផាត់ ពិទូរ្យ ដើម្បីធ្វើការសាកសួរនៅអធិការដ្ឋាននគរបាលស្រុកសំបូរ ដើម្បី កសាងសំណុំរឿងចាត់ការតាមនីតិវិធី ផងដែរ ៕