ទឹកភ្នែកប្រជាពលរដ្ឋជាច្រើនក្នុងចំណោម៦៨គ្រួសារ រស់នៅក្នុង ភូមិអូរអាម ឃុំស្រែខ្ទុម ស្រុកកែវ សីម៉ា ខេត្តមណ្ឌលគិរី កំពុងបានបង្ហូរទឹកភ្នែក ស្នើសុំថ្នាក់ដឹកនាំគ្រប់លំដាប់ថ្នាក់ ជួយអន្តរាគមន៌ផ្តល់យុត្តិធម៌ជូន ដល់ពួកគាត់ ខណៈដែលដីពួកគាត់ប្រមាណជាងមួយរយហិកតា ត្រូវបានបុគ្គលពីរនាក់ឈ្មោះ ចាន់ ស៊ុំ និងឈ្មោះ ទូច សុផល បានរំលោភយកធ្វើជាកម្មសិទ្ធរបស់ខ្លួន ។

ប្រជាពលរដ្ឋជាច្រើននោះបានអះអាងថា ដីទាំងអស់នោះ គឺពួកគាត់កាន់កាប់គាស់រានបង្កបង្កើនផលតាំងតែ
ពីឆ្នាំ២០០០មកម៉្លេះ ស្រាប់តែនៅឆ្នាំ២០១៧ ឈ្មោះ ចាន់ ស៊ុំ បានប្តឹងពលរដ្ឋក្នុងភូមិឈ្មោះ ពៅ អូន ទើប បែកធ្លាយថា ដីធ្លីរបស់ពួកគាត់ទាំង៦៨គ្រួសារ ត្រូវបានឈ្មោះ ចាន់ ស៊ុំ និងឈ្មោះ ទូច សុផល បានធ្វើប្លង់ ហ៊ុមព័ទ្ធយកជាកម្មសិទ្ធរបស់គេ ទាំងកសិផល ស្រែ និងចម្កា របស់ពួកគាត់ ប្រមូលផលជារៀងរាល់ឆ្នាំនោះ ។

ពលរដ្ឋទាំង៦៨គ្រួសារ សំណូមពរផងដែរដល់លោកទេសរដ្ឋមន្ត្រី ឧិម យ៉ិនទៀង ប្រធានអង្គភាពប្រឆាំង អំ ពើពុករលួយ សូមមេត្តាជួយបើកការស្រាវជ្រាវ ចំពោះបុគ្គលទាំងពីរខាងលើផង ពីព្រោះថាដីទាំងអស់នោះ ពួកគាត់រស់នៅកាន់កាប់ និងបង្កបង្កើនផល គឺមានទាំងរដ្ឋអំណាចភូមិឃុំដឹងឮផងដែរ ហើយតើបុគ្គលទាំងពីរ ជានរណា ដែលមានឥទ្ធិពលម៉្លេះ ដោយសុខៗស្រាប់តែមកធ្វើប្លង់ហ៊ុមព័ទ្ធយកដីពួកគាត់ទាំងអស់ ទាំងដឹងថា ចំការរបស់ពួកគាត់ប្រមូលផលរាប់សិបឆ្នាំមកហើយ ជាភស្តុតាងរបស់ពួកគាត់ស្រាប់ នោះ ។

ពលរដ្ឋទាំងអស់បានអះអាងថា ករណីដែលបុគ្គលឈ្មោះ ចាន់ ស៊ុំ និងឈ្មោះ ទូច សុផល អាចរំលោភយកដីរបស់ពួកគាត់យ៉ាងងាយបែបនេះ គឺប្រាកដជាមានមន្ត្រី អ្នកមានអំណាចមួយចំនួន សមគំនិត ឃុបឃិតនៅពី ក្រោយខ្នងមិនខាន បើពុំដូច្នោះនោះទេ មនុស្សម្នាក់ ឬក៏ពីរនាក់ ពួកគាត់ជឿថា គ្មានសមត្ថភាពណាដែល អាចធ្វើប្លង់ ហ៊ុមព័ទ្ធយកដីរបស់ ពួកគាត់បានយ៉ាងស្រស់ៗ បែបនេះនោះទេ ។

លើសពីនេះផងដែរ ប្រជាពលរដ្ឋទាំង៦៨គ្រួសារ សំណូមពរដល់ សម្តេចអគ្គមហាសេនាបតីតេជោ ហ៊ុន សែន បុរសខ្លាំងរបស់កម្ពុជា សូមមេត្តាជួយមានចំណាត់ការជួយដល់ទុក្ខលំបាករបស់ពួកគាត់ផង ពីព្រោះ ថា បើពួកគាត់ពិតជាត្រូវបុគ្គលពីរនាក់ ស្ងាត់ៗលួចធ្វើប្លង់យកដីពួកគាត់បានយ៉ាងងាយៗបែបនេះ តើនៅ ថ្ងៃខាងមុខទៅ ពួកគាត់ត្រូវមានអ្វីជាទីពឹងក្នុងជីវិត ហើយតើនេះឬ ការកាត់បន្ថយភាពក្រីក្ររបស់ថ្នាក់ដឹក នាំ មានចំពោះរាស្រ្តនោះ ៕