មានការអបអរសាទរពីប្រជាពលរដ្ឋរស់នៅក្នុងខេត្តទឹកដីស្រុកកែវសីម៉ា ជាពន់ពេក ខណៈដែលមន្ត្រីអាជ្ញាធរ ស្រុក បានមានចំណាត់ការដ៏ក្តៅគគុក បង្ក្រាបទីតាំងខារ៉ាអូខេ តាមបទបញ្ជារបស់ថ្នាក់ដឹកនាំបាន ដោយមិន លើកលែងចំពោះទីតាំងដែលហ៊ានប្រឆាំងលួចបើកទីតាំងខារ៉ាអូខេ ច្រៀងរាំពពាក់ពពូន បើទោះជាពួកគេបាន ដឹងថា ទាំងអស់នោះ វាជាការប្រឆាំងទៅនឹងបម្រាម ពាក់ព័ន្ធទៅនឹងករណីវិរ៉ុសកូវីដ១៩ ដែលកំពុងតែព្យាបាទ សុខភាពរបស់ពលរដ្ឋនោះ ។

គួររំលឹកថា កាលពីវេលាម៉ោង ២២ និង៣០នាទី ត្រូវនឹងថ្ងៃទី១២ ខែសីហា ឆ្នាំ២០២០ កន្លងទៅនេះ កម្លាំង អធិការដ្ឋាននគរបាលស្រុកកែវសីម៉ា សហការជាមួយកម្លាំងប៉ុស្តិ៍នគរបាលស្រែខ្ទុម និងមន្ត្រីទេសចរណ៍ស្រុក បានចូលរួមសហការបង្ក្រាបករណីជាក់ស្ដែងលួចបើកខារ៉ាអូខេយីហោ កាឡាក់ស៊ីធូរ ដឹកនាំដោយលោកស្រី ឧត្តមសេនីយ៍ត្រី ហ៊ួន គឹមហេង ស្នងការរងទទួលផែនប្រឆាំងការជួញដូរមនុស្ស និងការពារអនិតីជន ក្រុមការ ងារ បានចុះបង្ក្រាប និងដកហូតសម្ភារៈមួយចំនួនដូចខាងក្រោម ១.ថាច់ ស្គ្រីន ចំនួន ៣ គ្រឿង ២.អឹមផ្លីចំនួន ៣ គ្រឿង ៣.ក្បាលម៉ៃក្រូហ្វូនចំនួន ៣ គ្រឿង ៤.ម៉ៃក្រូហ្វូនសំរាប់ច្រៀងចំនួន ២ គ្រឿង ៥.អីហ្វេកចំនួន ៣ គ្រឿង ៦.ផ្លាស់ផ្ទុកចង្រៀងចំនួន ១ គ្រឿង ។

បច្ចុប្បន្នវត្ថុតាងខាងលើ ដែលបានដកហូត ត្រូវបានយកមករក្សាទុកនៅស្នងការរដ្ឋាននគរបាលខេត្តមណ្ឌលគីរី ដើម្បីសាងសំណុំរឿងតាមនីតិវិធីច្បាប់។

គួរបញ្ជាក់ថា ម្ចាស់ខារ៉ាអូខេដែលមានយីហោកាឡាក់ស៊ីធូនេះ មានឈ្មោះស៊ិន ពន្លក ជាមន្ត្រីនគរបាលប៉ូលីស ពាក់ស័ក ៣ថែមទៀតផង ហើយសព្វថ្ងៃលោក ស៊ិន ពន្លក រស់នៅ ភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី ហើយក្រៅពីមុខងារជានគរបាលប៉ូលិសស័ក្តិ៣ លោក ស៊ិន ពន្លក ក៏បានប្រកបរបរមួយទៀត គឺបើកខារ៉ាអូខេហៅថា KTV ដែលជ្រកក្រោមស្លាកយីហោ កាឡាក់ស៊ីធូ នេះតែម្ដង ។

លោក ស៊ិន ពន្លក គឺជាមន្ត្រីនគរបាលប៉ូលីស តែលោកហាក់ដូចជាមិនយល់ ហើយសំដែងខ្លួនពើងទ្រូងប្រឆាំង នៅអ្វីដែលរាជរដ្ឋាភិបាល និងរដ្ឋមន្ត្រីក្រសួងសុខាភិបាល បានដាក់ប្រទេសនៅក្នុងភាពអាសន្ន។ ក្រោយពីមាន ជំងឺ កូរ៉ូណា ឬ covid-19 បានផ្ទុះឡើងសារជាថ្មី រដ្ឋមន្ត្រីក្រសួងសុខាភិបាល ក៏បានចេញសេចក្តីណែនាំដល់ប្រជា ពលរដ្ឋកុំឲ្យមានការជួបជុំ ឬប្រមូលផ្ដុំគ្នាតាមក្លឹបកម្សាន្ត និងខារ៉ាអូខេ តែលោក ស៊ិន ពន្លក បែរជាមិនអនុវត្តន៌ តាមអនុសាសន៍របស់សម្ដេច និងរដ្ឋមន្ត្រីក្រសួងសុខាភិបាលនោះឡើយ លោក ស៊ិន ពន្លក បែរជាលួចបើក ខារ៉ាអូខេ ការផឹកស៊ីជួបជុំ ដោយមិនកោតក្រែងពីច្បាប់ និងបទបញ្ជារបស់ថ្នាក់ដឹកនាំនោះឡើយ ។

យ៉ាងណាមិញ ប្រជាពលរដ្ឋរស់នៅក្នុងស្រុកកែវសីម៉ា ខេត្តមណ្ឌលគិរី បានស្តែងចេញការត្រេកអរយ៉ាងខ្លាំង ចំពោះចំណាត់ការរបស់លោកស្រី ឧត្តមសេនីយ៍ត្រី ហ៊ួន គឹមហេង ស្នងការរងទទួលផែនប្រឆាំងការជួញដូរ មនុស្ស និងការពារអនីតិជន ខេត្តមណ្ឌលគិរី និង លោកវីរៈសេនីយ៍ឯក ហេង អ៊ួង អធិការស្រុកកែវសីម៉ា និង ប៉ុស្តិ៍នគរបាលស្រែខ្ទុម ដែលបានចុះបង្ក្រាបទាន់ពេលវេលា ៕