ចឹងបានតែថា មនុស្សមានច្រើនយ៉ាង មនុស្សមានច្រើនយ៉ាងពិតមែន យ៉ាងណាមិញបុរស២នាក់ មិនដឹងថា ដើម្បីបំពេញចំណង់ចិត្តសប្បាយខ្លួន ឬក៏យ៉ាងណានោះទេ ស្រាប់តែសុខៗនាំគ្នាទៅវាយកំទេចព្រះបដិមារ ក្នុង វត្តឲ្យយ៉ាងសង្ហា ដោយមិនខ្លាចញញើតទៅនឹងច្បាប់ ឬក៏បុណ្យបាបអ្វីបន្តិចសោះម៉ង ។

គួររំលឹកថា កាលពីថ្ងៃទី១៧ ខែវិច្ឆិកា ឆ្នាំ២០២០ បុរសក្លាហានអត់សាសនា២នាក់ ត្រូវបានកម្លាំងសមត្ថកិច្ចនគរបាលមូលដ្ឋានឃាត់ខ្លួន បន្ទាប់ពីពួកគេបានចូលធ្វើសកម្មភាពវាយបំផ្លិចបំផ្លាញ បណ្តាលឲ្យខូចខាតដល់ បូជនីយដ្ឋានសាសនា ឬបូជនីយដ្ឋានវត្ថុ ក្នុងព្រះពុទ្ធសាសនា ស្ថិតនៅលើភ្នំ ក្នុងបរិវេណ វត្តបាសិទ្ធត្រៃត្រិង្ស
ក្នុងភូមិតាពិជ ឃុំ ឈ្វាំង ស្រុកពញាឮ ខេត្តកណ្តាល ។

បុរសជាជនសង្ស័យម្នាក់ឈ្មោះ គង់ សំណាង ភេទប្រុស អាយុ៣៩ឆ្នាំ មុខរបរមិនពិតប្រាកដ មានទីលំនៅភូមិព្រៃពង្រ សង្កាត់ពញាពន់ ខណ្ឌព្រែកព្នៅ រាជធានីភ្នំពេញ (ជាជនដៃដល់) ហើយម្នាក់ទៀត ឈ្មោះ ប៊ិន សុភា ភេទប្រុស អាយុ៣៩ឆ្នាំ មុខរបររត់តាក់ស៊ី មានទីលំនៅភូមិ ត្រពាំងស្វាយ សង្កាត់គោកឃ្លៀង ខណ្ឌសែនសុខ
រាជធានីភ្នំពេញ ខ្លួនជាអ្នកបើកបររថយន្ត។

នៅក្រោយពេលឃាត់ខ្លួន សមត្ថកិច្ចបានដកហូតយកវត្ថុតាង រួមានរថយន្តម៉ាក LEXUS ពណ៌ ប្រផេះផលិតឆ្នាំ២០០៣ ផ្លាកលេខ2AV.9545 សោរថយន្ត១ កូនសោរ២ ទូរសព្ទ័១គ្រឿងម៉ាក iPhone ។

ទាក់ទិននឹងការចាប់ឃាត់ខ្លួន បងៗក្លាហានទាំង២នាក់ខាងលើនេះ សមត្ថកិច្ចបានឲ្យដឹងថា នៅវេលាម៉ោង៩ព្រឹកថ្ងៃ១៧ ខែវិច្ឆិកា ២០២០នេះ មានឈ្មោះ សូត្រ ស៊ីម ភេទប្រុស អាយុ៦៦ឆ្នាំ មុខងារជាមន្ត្រីវប្បធម៍អភិរក្សភ្នំបាសិទ្ធ បានតេទូរស័ព្ទរាយការណ៍មកប៉ុស្តិ៍នគរបាលរដ្ឋបាល ឃុំឈ្វាំងថា មានជនសង្ស័យ២នាក់ បានជិះរថយន្ត១គ្រឿងម៉ាក LUXUS មកឈប់លើភ្នំបាសិទ្ធត្រៃត្រឹង្គ ត្រង់បរិវេណវត្ត ក្នុងនោះជនសង្ស័យម្នាក់ឈ្មោះ គង់ សំណាង បានបើកទ្វារស្ទុះចេញពីក្នុងរថយន្តរត់សំដៅទៅលើព្រះវិហារ ដែលស្ថិតនៅលើភ្នំវត្តបាសិទ្ធត្រៃត្រិង្ស រួចធ្វើសកម្មភាពធាក់ទ្វារព្រះវិហារ បណ្តាលឲ្យបាក់របាទ្វារ បន្ទាប់មកជនសង្ស័យបានចុះមកក្រោមវិញ នឹងធ្វើសកម្មភាពវាយបំផ្លិចបំផ្លាញរូបសំណាក ព្រះនាងទេពប្រណម្យ៤ និងខ្ទមអ្នកតា១ រួចចុះតាមជណ្តើរទាញបំ បាក់បង្គោលសូឡា និងធាក់ក្បាលនាគ២ បំបាក់ចោល តែម្តង ។

បន្ទាប់មកទៀត ជនសង្ស័យបានរត់ចូលទៅក្នុងប្រាសាទស្រីគ្រប់ល័ក្ខ វាយបំផ្លិចបំផ្លាញរូបសំណាកក្នុងប្រាសាទនោះទៀត ដូចមាន រូបសំណាក់ស្រីគ្រប់ល័ក្ខ១ រូបសំណាក់ព្រះនាងពៅ១ .រូបសំណាក់កុមារពេជ្រ១ .រូបសំ ណាក់ព្រះអង្គចេក១ និងលើកបោះបាយសីចោល ហើយជនសង្ស័យបានវាយថូផ្កា ពាងទឹកបែកអស់២ ដែលនៅក្បែរប្រាសាទ នឹងទ្រព្យសម្បត្តិក្នុងវត្តមួយចំនួនទៀត ។

ក្រោយមកពីទទួលបានព័ត៌មានភ្លាមៗ កម្លាំងប៉ុស្តិ៍នគរបាលឈ្វាំង បានសហការជាមួយកម្លាំងផ្នែកនគរបាលយុត្តិធម៌ស្រុក ចុះទៅកន្លែងកើតហេតុ នឹងបានធ្វើការឃាត់ខ្លួនជនសង្ស័យទាំង២នាក់ និងមធ្យោបាយធ្វើដំណើរ រថយន្តមួយគ្រឿង បញ្ជូនទៅកាន់អធិការដ្ឋាននគរបាលស្រុកពញាឮ ដើម្បីសាកសួរ និងបន្តចាត់ការតាមនីតិវិធី ។

ទោះជាយ៉ាងណា ការវាយបំផ្លិបំផ្លាញទ្រព្យសម្បត្តិសាធារណៈរបស់វត្ត នេះ បុរសទាំងពីរ យើងនៅមិនទាន់ដឹង លទ្ធផលពួកគាត់ ទៅជាយ៉ាងណានៅឡើយទេ ៕