ថ្ងៃទី១២ ខែតុលា ឆ្នាំ២០២០ ម្សិលមិញនេះ រដ្ឋបាលខេត្តអត្តពឺ នៃប្រទេសឡាវ បានប្រកាសប្រាប់ដល់រដ្ឋបាល ខេត្តស្ទឹងត្រែង ត្រូវប្រុងប្រយ័ត្ន ឲ្យបានខ្ពស់ ខណៈដែលឥទ្ធិពលព្យុះលីនហ្វា ធ្វើឱ្យកម្ពស់ទឹកនៅទន្លេនានាកើនឡើង ជាពិសេស គឺទឹកទន្លេសេកុង ចាប់ពីថ្ងៃទី១១ ដល់ ១៣ ខែតុលា ឆ្នាំ២០២០ នេះ។

ស្របពេលនេះ ក្រុមហ៊ុនវារីអគ្គិសនីភូមិភាគកណ្ដាលរបស់វៀតណាម នឹងបើកទឹកចេញពីអាងស្តុកទឹកវារីអគ្គិសនី ផងនោះ ដូច្នេះទឹកដែលបង្ហូរចេញពីអាងស្តុកទឹកវារី ព្រមជាមួយជំនន់ទឹកភ្លៀង នឹងហូរចុះទៅខេត្តស្ទឹងត្រែង តាម ទន្លេសេកុង រដ្ឋបាលខេត្តអត្តពឺ ក៏បានប្រាប់ឱ្យខេត្តស្ទឹងត្រែង ត្រៀមខ្លួន ដើម្បីចាត់វិធានការ និងបង្ការ ចំពោះ គ្រោះធម្មជាតិនេះ។

ស្របពេលទៅនឹងការជូនដំណឹងរបស់ ខេត្តអត្តពឺ ប្រទេសឡាវ ផងដែរនោះ ប្រជាពលរដ្ឋជាច្រើន ដែលរស់នៅ តាមដងទន្លេ កំពុងមានការព្រួយបារម្ភជាខ្លាំង ខណៈដែលនៅថ្ងៃទី១៣ ខែតុលា ឆ្នាំ២០២០ នេះ ក្រសួងទើបតែ បានជូនដំណឹងថា នឹងមានព្យុះចំនួន២ បន្ថែមទៀត និងឆ្លងកាត់កម្ពុជា ចាប់ពីថ្ងៃទី១៤ រហូតដល់ថ្ងៃទី២០ ខែតុលា ស្របពេលខេត្តអត្តពឺ ប្រទេសឡាវ ក្រុមហ៊ុនវារីអគ្គិសនីភូមិភាគកណ្ដាលរបស់វៀតណាម បើកទ្វារទឹកដើម្បីការ ប្រជាជនខ្លួន ។

ទោះជាយ៉ាងណា អង្គភាពព័ត៌មានទូរទស្សន៌កែវភ្នែក នឹងព្យាយាមសុំការបញ្ជាក់បន្ថែមពីអាជ្ញាធរខេត្តស្ទឹងត្រែង ផ្សាយជូនមហាជនជ្រាបនៅពេលខាងមុខ ៕